Janice Man為懲罰論道歉，Angelababy為抽煙道歉，這對模twins真趣致，連「闖禍」都拍住上，其實都幾無辜，說一句天真的感想，抽一根無邪的香煙，兩位女孩子應該不認為自己犯了甚麼錯，必然是經理人公司下令認衰了事以免影響錢途。

大熊貓華南虎你就而得佢日日做年年生，青少年做就傷天害理!?

《Juno少女孕記》體現的卻是西方文明與包容，劇情重點不在於事發年齡，重要的是他們擁有自決命運的智慧與自由。Juno挺着大肚繼續學業，師長雖然驚訝，但會尊重Juno與胎兒的人權；同學儘管取笑，但不會作出傷害。她自行尋找領養家庭接收BB贊助醫療費，不用墮胎殘殺生命，又能造福別人。最文明係由於事件起因係Juno主動色誘男同學，該男生既無刑責亦無「父」責連缺點都唔使記一個，如常過活。換了在香港，他必定一身蟻，在香港，但凡青年男女性交，警方校方都會先假定是男方強姦女方。

兩齣戲都好看，不過《早熟》是煽情悲劇，觀眾覺得主角瀨嘢好大鑊﹔《Juno少女孕記》是幽默喜劇，主角開朗可愛對青春無悔。毫無疑問，Juno令人開心得多。

                                                    撰文:曹雪聰

月前《蘋果日報》選金話梅爛片，《七擒七縱七色狼》成為眾矢之的；金像獎的大贏家則是《投名狀》。爛片好片彷彿勝負分明。事實上大部分金話梅入圍電影我都看過，午夜夢廻自問都覺得濫。整體上張名單都算實至名歸，《美女食神》美女廚房+食神smart ass得過份、《嚦咕嚦咕對對碰》作為笑片唧都唔笑、《天堂口》扮嘢造作、《明明》冇人睇得明，都係爛到火滾，不過呢批電影票房慘淡，受災人數有限。

好似我同朋友講睇咗《七色狼》，個個都話有冇搞錯咁都睇，我話唔係噃孟瑤肥肥白白好惹味喎，七十零蚊買DVD睇完即放收番四十，就算俾佢搵笨都係一餐飯錢啫！蝦，結果真係俾佢呃咗個常餐連凍飲加兩蚊。試問點估得到掛羊頭賣齋菜，孟瑤竟然演出密實正經，浪費咗佢嘅青春同我嘅陽壽，笑料又唔掂只係得王祖藍模彷新馬仔夠生鬼。

不過咁，如果你用槍指住迫我翻睇一套，咁我又會揀《七色狼》而唔係《投名狀》。

 幾時都話「認真大片」唔一定好，「小本胡鬧」亦未必爛，聲勢愈大先愈易爛，大片《長江7號》星迷媽媽聲，「教育電視咩！」成本低過電視劇嘅《愛鬥大》其實仲悶，業餘習作，不過冇期望就冇失望，見Janice Man幾靚仲覺得有驚喜添。有啲戲並非公認爛，而係見仁見爛，即係拍得有心機嘅另類片，唔係人人中，評價可以好極端。譬如《野良犬》，導演想講啲嘢咁，拍得好沉重，但劇本牽強，每一幕我都會問一句「點解唔報警？」，好多本地江湖片動作片劇本都過唔到呢關，大橋唔通劇情就不能感動人，主角愈慘我就愈氣悶。另一套《破事兒》卡士強勁卻票房慘淡，反而我鐘意喎，題材有趣女角省鏡仲幾好笑，睇戲娛樂就係咁簡單。

唔收得只怪片名費解，彭浩翔前作《出埃及記》都係咁死，佢明知故犯，都唔知讚佢有性格定彈佢冇sense好！唔可以怪觀眾接受能力低㗎，大家瀨過太多嘢。

買飛睇戲已經係一場冇把握嘅賭博，若果連戲名都唔明，即係賭乜都唔知，點下注呀?! 喂，套戲幾爛都冇得去消委會投訴要求退款喎，…話時話，其實可唔可以呢?!

70年代，我五歲時阿爺教落，買嘢唔識揀，認住德國製造冇衰，當然產品上刻印的是Made In Germany。到今時今日，許多德國品牌已於國外設廠，本土生產的更加矜貴，宣傳時可以不用或不屑使用任何花巧口號標語，廣告上只是「德國製造」四隻大字一件商品，最多加埋查詢電話，夠了，毋須多講，有乜好？德國製造囉！有咩賣點？冇㗎，德國製造囉！全人類都明白這四字的含意是：工藝精湛、技術先進、可靠耐用、設計簡約。

P.S. 文中沒提日本車，因為日本是另一個德國，由大發到凌志都在追逐德國車的成就，睇到尾燈，未過到頭！但日本人已經好犀利，須知德國有歐盟支援，行業分工，專心造車。島國日本孤伶伶，崇尚自給自足，日本人甚麼都懂造而甚麼都造得好。Made In Japan的聲望和Made In Germany各有千秋。